MƏMMƏDOVA QƏSİRƏ TOFİQ QIZI
Kafedranın baş müəllimi – Məmmədova Qəsirə Tofiq qızı 1964-cü il iyul ayının 15-də Gəncə şəhərində ziyalı ailəsində anadan olmuşdur. Azərbaycanlıdır.
1971-ci ildə Gəncə şəhər M.Ə.Sabir adına 5 saylı ümumtəhsil məktəbinin birinci sinfinə daxil olub, 1979-cu ildə həmin məktəbin səkkizinci sinfini bitirmişdir. 1974-1979-cu illərdə Gəncə şəhər 1 saylı Uşaq musiqi məktəbinin fortepiano sinfində təhsil almışdır.
1979-cu ildə Q.Hüseyinli adına Kirovabad orta ixtisas musiqi məktəbinin fortepiano şöbəsinə daxil olub, 1983-cü ildə həmin məktəbi bitirmişdir.
1986-cı ildə Ü.Hacıbəyov adına Qırmızı Əmək Bayrağı ordenli Azərbaycan Dövlət Konservatoriyasına (indiki Ü.Hacıbəyli adına Bakı Musiqi Akademiyası) fortepiano ixtisası üzrə qiyabi şöbəyə daxil olub, 1991-ci ildə həmin ali məktəbi bitirmişdir.
26.08.1983 – 05.09.1987-ci illərdə Azərbaycan SSR Mədəniyyət Nazirliyinin göndərişinə səsasən Naftalan şəhər 7 illik musiqi məktəbində fortepiano müəllimi işləmişdir.
08.09.1987 – 02.09.1991-ci illərdə Kirovabad şəhəri Q.Hüseyinli adına orta ixtisas musiqi məktəbində konsertmeyster vəzifəsində işləmişdir.
02.09.1991-ci ildən H.Zərdabi adına Gəncə Dövlət Pedaqoji İnstitutunda (indiki Gəncə Dövlət Universiteti) “Musiqi fənləri” kafedrasında müəllim işləmiş, 2004-cü ildən isə baş müəllim vəzifəsində işləyir.
13.00.01 – Ümumi pedaqogika, pedaqogikanın və təhsilin tarixi ixtisası üzrə Azərbaycan Dövlət Pedaqoji Universitetində 12 yanvar 2010-cu ildə “Şagirdlərin vətənpərvərlik tərbiyəsində Azərbaycan muğamlarından istifadənin imkan və yolları” mövzusunda fəlsəfə doktoru elmi dərəcəsi almaq üçün dissertasiyanı müdafiə etmişdir. Azərbaycan Respublikasının Prezidenti yanında Ali Attestasiya Komissiyasının 15 mart 2011-ci il tarixli (prototol № 09-k) qərarı ilə 13.00.01 – Ümumi pedaqogika, pedaqogikanın və təhsilin tarixi ixtisasında pedaqogika üzrə fəlsəfə doktoru elmi dərəcəsi verilmişdir.
20-dən artıq elmi əsərin müəllifidir (“Şagirdlərin vətənpərvərlik tərbiyəsində Azərbaycan muğamlarının tərbiyəvi imkanları”. Gəncə Dövlət Universitetinin elmi əsərlər məcmuəsi. Bakı, Mütərcim, 2000. s.341-343; “Fortepiano sinfində texniki bacarıq və vərdişlərin inkişafı” (tersiyalar). Gəncə Dövlət Universitetinin “Elmi xəbərlər” jurnalı. Gəncə, 2012, №3, s.237-239; “Gəncənin musiqi mədəniyyətinin inkişafında Məşədi Cəmil Əmirovun fəaliyyətinin yeri və əhəmiyyəti”. “Gəncənin musiqi mədəniyyətinin tarixi” mövzusunda elmi-praktik konfransın materialları. Gəncə, 15-16 noyabr, 2019, s.60-64 və s.).
1997-ci ildən Yeni Azərbaycan Partiyasının üzvüdür.